अनंत (बाळशेठ) लोखंडे यांचे दु:खद निधन
तळा तालुक्यातील राजकीय चाणक्य हरपला
महाराष्ट्र २४ आवाज
(तळा श्रीकांत नांदगावकर) श्रीवर्धन मतदारसंघाचे शिवसेना सल्लागार अनंत वसंत उर्फ बाळशेठ लोखंडे यांचे शनिवार दि.१९ रोजी वयाच्या ५९ व्या वर्षी निधन झाले. तळा तालुक्यातील राजकीय चाणक्य म्हणून त्यांची ओळख होती. सक्षम विचारसरणी, बहुआयामी व्यक्तिमत्त्व,एक कणखर नेतृत्व म्हणूनही ते परिचित होते. बाळशेठ यांनी आपल्या राजकीय जीवनात अनेक चढ उतार पाहिले मात्र कोणत्याही पदासाठी त्यांनी कधीही लाचारी पत्करली नाही. श्रीवर्धन मतदारसंघाचे सल्लागार तसेच माजी केंद्रीय मंत्री अनंत गीते यांचे ते अत्यंत विश्वासू सहकारी होते. स्पष्टवक्तेपणा आणि मनमिळाऊ स्वभाव तसेच आपल्या सामान्य कार्यकर्त्याच्याही अडीअडचणीला धावून जात असल्यामुळे तालुक्यात त्यांना मानणारा मोठा वर्ग होता. त्यांच्या निधनाचे वृत्त समजताच संपूर्ण श्रीवर्धन मतदारसंघात शोककळा पसरली. तालुक्यातील व्यापाऱ्यांनी आपली दुकाने त्वरित बंद केली. तसेच अनेक मान्यवर आणि कार्यकर्त्यांकडून त्यांना श्रद्धांजली अर्पण करण्यात आली. त्यांच्या पश्चात पत्नी एक मुलगा सून आणि एक मुलगी असा परिवार आहे.
